جنگي حالتن ۾ ڪنهن خاص فوجي ٺڪاڻي کي نشانو بڻائيندي، آسپاس جي خانگي ملڪيت، مال ۽ شهري جانين کي نقصان پهچائڻ واري عمل کي هن اصطلاح ذريعي بيان ڪيو ويندوآهي. اِن ڏس ۾ ڪاهي ايندڙ ڌُر جي نيت کي ذهن ۾ رکي، مُتاثر ڌُر کي پهتل نقصان جو اندازو لڳايو ويندو آهي. ڪاهي ايندڙ جيڪڏهن ڄاڻي واڻي غير فوجي نقصان ڪيا آهن، ته اهڙي عمل جي ندا ڪرڻ سان گڏ عالمي سطح تي ان ظُلم کي نروار ڪري، جنگي ڏوهن واري عدالت ۾ ثبوت طور پيش ڪيو ويندو آهي. ڇاڪاڻ ته بين الاقوامي قانون هيٺ غير فوجي ٺڪاڻن جي تحفظ کي جنيوا ڪنويننشن (1969ع) ۽ جنيوا پروٽوڪول (1977ع) ذريعي واضح طور تي يقيني بنائڻ تي زور ڏيندي، شهري آباديءَ ۽ شهري ٺڪاڻن تي ڄاڻي واڻي، ڪنهن به ڌُر طرفان حملو ڪرڻ ”جنگي ڏوهه“ قرار ڏنل آهي. ڇو جو ٽيڪنالاجي ۽ فوجي سائنس ۾ جدت اچڻ ڪري اهو واضح ٿي چُڪو آهي ته دُشمن مُلڪ جي فقط فوجي ٺڪاڻن کي نشانو بنائڻ ۽ شهري آباديءَ کي بچائڻ عين ممڪن آهي. هي اصطلاح نار جي جنگ دوران گهڻو استعمال ڪيو ويو، جتان پوءِ عالمي ميڊيا ۾ مشهور ٿيو.